快捷搜索:  小钰  as  赵梦玥

幕后玩家

大台近期热播剧集《幕后玩家》,三位公关主角非富则贵,既揸林宝坚尼超跑,更霸气到用成叠金牛掟人,有钱、有女又有面!

现实中,见尽社交圈人和事的名公关丁子高、侯维德和郑绍康,则声言要做一个成功的公关,要日日孭住个「忍」字做人,他们更曾因为牌子搞活动后的传媒报道版面较细,而被客户闹到狗血淋头。要做「真.幕后玩家」,你估真係话咁易?

 

 

丁子高:「唔妥」都要一揽泯恩仇

Collaboration group公关市场策划公司老闆丁子高,这天埋位拍摄前,急急换上客户品牌的首饰和服装,他说:「个客想我戴,要帮帮手!」客户是米饭班主,丁子高向来识做,就算见到「唔妥」的人,他同样可以做到面面俱圆,「即使唔妥大家,见到面揽一揽咪当冇事啰,呢啲唔係叫虚伪,只係将令人尴尬嘅局面变得缓和啲,係友善嘅虚伪。做公关要宏观,睇四方八面,并以大局为重,如果所有嘢以自己角度出发,唔会做到成功嘅公关。」

丁子高的身份特殊,太太是歌手杨千嬅,可以经常以夫妻档上阵,行家见到,自然份外眼红,「佢(千嬅)係我老婆呢个係事实,所以我仲要更加谦虚,唔想令人觉得我好了不起。好多时对面公司以为我争生意,其实係啲客主动搵我,人哋唔知乱讲,会影响我公司声誉。(敌对公关)喺背后讲我唔係问题,如果五成係真加三成幻想都算,如果全幻想就好过份。试过喺活动前一星期,被另一公关唱,话我抢生意,其实嗰个项目我已经倾咗一年,嗰次我真係有啲唔开心,但无办法,唔通唱番人咩?」

丁子高由歌手转营做公关已经十二年,见尽不同的人和事,不时要做拆弹专家,少啲EQ都唔掂。他曾遇过客户,讲明活动要做报纸的娱乐头条(C1)和杂誌封面,可惜结果事与愿违,被恶駡一顿,「客户有要求,我只可以尽力去做,但唔係我哋可以全部控制,出来效果未如理想,(客户)会打嚟闹我。」

除了作为客户和传媒的桥樑,有时还要贴身侍候出席活动的红星,斗智兼斗力。「有次请咗一位韩星出席商场活动,临上台前十分钟,佢先话唔做传媒访问,好彩记得份合约有写明,我即刻搵个同事print出嚟畀佢睇,有证有据,佢先唔可以话唔做就唔做。」不过有时遇到麻烦事,亦要硬食,「有次邀请一位港星到外国出席活动,不嬲喺酒店房叫room service都无上限,但佢叫咗一支八万蚊嘅红酒,个客知道咗即刻牙痛咁声向我诈型,我都冇办法,以后惟有set番上限。」唔好问边位!做公关要保密,密密实实。

您可能还会对下面的文章感兴趣: